"Sömu kröfur og á hinum Norðurlöndunum"

Illugi Gunnarsson menntamálaráðherra segir að eftir breytingar á útlánareglum LÍN verði reglurnar sambærilegar við útlánareglur hinna Norðurlandanna. Þá verða námsframvindureglur þær sömu og tíðkaðist til ársins 2007.

Rósa Björk Brynjólfsdóttir, varaþingmaður Vinstri Grænna, innti Illuga um svör við því hvers vegna reglunum hefði verið breytt. „Stjórnarformaður LÍN og hæstvirtur mennta- og menningarmálaráðherra staðfesta að gerð verði krafa um að námsárangur verði 75% í stað 60%."

Illugi svaraði þá: „Ég ítreka, það er lagt upp með það að námsframvindukrafan verði sú sama og árið 2007. Það er lagt upp með það að námsframvindukrafan verði eins og þekkist á Norðurlöndum. Það lagt upp með það, virðulegi forseti, að grunnframfærslan verði aukin, þannig að námslánin verði hækkuð. Það er það sem skiptir máli fyrir stúdentana að verði gert."

Segir fyrirvarann of skamman

Rósa gerði athugasemdir við skamman fyrirvara á breytingunum. „Ætlar hann að ganga gegn góðri stjórnsýslu í þessu frumvarpi sínu og koma í veg fyrir að námsmenn fái nægan fyrirvara eins og þeir eiga rétt á, eða ætlar hæstvirtur mennta- og menningarmálaráðherra ásamt stjórnarformanni LÍN að gefa ungu námsfólki falleinkunn."

Rósa lét ekki þar við sitja heldur sagði hún Illuga Gunnarson og Jónas Friðrik Jónsson, stjórnarformann LÍN „þekkja það á eigin skinni hvernig er að fá falleinkunn í einni viðamestu úttekt á íslensku samfélagi."

Illugi sagði þá: „Auðvitað vildi ég hafa lengri tíma, virðulegi forseti, til að bregðast við þessu. En ríkisstjórnin tók við á þeim tíma sem hún tók við á. Það hafa verið hafðar hraðar hendur og snör handtök til að bregðast við. Þetta er niðurstaðan."