"Hagsmunir neytenda eru að engu hafðir"

Samtök Ferðaþjónustunnar og Samkeppniseftirlitið hafa þungar áhyggjur af stöðu sem er komin upp vegna einokunarstöðu á farþegaflutningum frá Keflavíkurflugvelli til Reykjavíkur. Samkeppniseftirlitið segir hagsmunum þeirra sem nýta rútuna „í engu sinnt," og undir þetta taka SAF.

Lögum um fólks- og farmflutninga var breytt árið 2011 í því skyni að veita sveitarfélögum heimildir til að skipuleggja almenningssamgöngur á svæðinu. Í skjóli laganna hefur Vegagerðin brugðið á það ráð að veita Samtökum sveitarfélaga á Suðurnesjum einokunarleyfi á rútunni frá Keflavíkurflugvelli til Reykjavíkur.

Gunnar Valur Sveinsson, verkefnastjóri hjá SAF, segir að um ólögmæta einokun sé að ræða. „Við leggjumst gegn þeim [áformunum innsk blm.] vegna þess að þetta er að okkar mati hreinlega ólöglegt eins og kemur fram í áliti Samkeppniseftirlitsins."

Í ítarlegu áliti Samkeppniseftirlitsins segir meðal annars: „Einnig sé einkaleyfið ólögmætt þar sem rekstur á leiðinni standi fyllilega undir sér og því fái styrkveiting ekki staðist skv. EES samningnum og fyrrgreindri reglugerð EB"

Engin samkeppni og neytendur hafðir úti í kuldanum

Gunnar segir áformin munu gera út um samkeppni. „Aðalatriðið er að það er samkeppni á þessari leið og sú samkeppni er búin að virka nú í tvö ár."

Aðspurður hvaða þýðingu það hefur fyrir neytendur að hafa þennan háttinn á segir hann: „

Það mun þýða það til lengdar að verð á leiðinni mun hækka." Þannig eru hagsmunir neytenda hafðir að engu, enda býst Gunnar ekki við því að þjónustan muni batna í skjóli einokunar.

Aðspurður hagsmunir hvers hafi þá verið hafðir að leiðarljósi segir Gunnar: „Þeir eru að gera þetta fyrir Samtök Sveitarfélaga á Suðurnesjum sem eru að fá heilmikið af tekjum fyrir þessa leið."

 

Í áliti sem Samkeppniseftirlitið sendi frá sér vegna málsins segir að rök fyrir mikilvægi einokunar á svæðinu standist ekki skoðun. Þá segir í álitinu að hvatar SSS með útboðinu séu fólgnir í að afla SSS hámarkstekna, en hagsmunum þeirra sem nýta þurfa þjónustuna er í engu sinnt. Verð muni því hækka, enda hefur einokunaraðilinn beina hagsmuni af því.