Freyja getur ekki flutt jómfrúræðuna úr púlti Alþingis

„Pontan er ekki aðgengileg,“ segir Freyja Haraldsdóttir varaþingmaður Bjartrar framtíðar, en vegna fötlunar sinnar mun hún ekki geta flutt jómfrúræðu sína úr pontu eins og aðrir þingmenn.

Freyja tók sæti á Alþingi í dag í fjarveru Guðmundar Steingrímssonar og segir daginn hafa verið lærdómsríkan.

„Maður er að læra hvernig hlutirnir ganga fyrir sig og það er margt að læra,“ segir Freyja. Um aðgengi fyrir fatlaða á Alþingi segir hún að gamla byggingin hafi augljóslega ekki verið byggð með fatlaða í huga. Þar séu til að mynda háir þröskuldar sem geti verið erfiðir fyrir þá sem þurfa að ferðast um í hjólastólum.

Líklega er mesta áskorunin sú að Freyja mun ekki geta staðið við púltið og ávarpað þingsal. Því þarf að koma hljóðnema fyrir á borði hennar, sem og myndavél.

Það eru fordæmi fyrir því að þingmaður ávarpi salinn úr eigin sæti. Freyja segir málið þó endurspegla stöðu fatlaðra í samfélaginu. „Að vissu leyti finnst mér sorglegt að það þurfi að gera þessar breytingar,“ segir Freyja.

Spurð hvenær hún hyggist flytja fyrstu ræðu sína, segist hún vonast til þess að hún geti flutt jómfrúræðuna næsta mánudag.