Ofurhugi í háska: "Það vissi enginn hvort hún væri lífs eða liðin"

"Þetta var hrikalegt meðan á því stóð. Hún stökk fram af hótelinu en hefur sennilega ekki stokkið nógu langt og lenti þess vegna utan í byggingunni," segir Sóldís Elfa Loftsdóttir sem varð vitni að því þegar fallhlífarstökkvari lenti í miklum háska þegar hann stökk fram af Hótel Bali á Benidorm á föstudaginn var.

Hópur fallhlífastökkvara, sem stunda svokallað "base jump", gerði sér það að leik að stökkva fram af þaki Bali-hótelsins, sem er 53 hæðir. Stökk Mariu Steinmayr frá Austurríki fór hins vegar ekki eins og áætlað var og skall hún tvisvar harkalega utan í hótelbyggingunni.

"Hún kipptist að hótelinu og lenti utan í byggingunni. Hún spyrnti sér svo frá en lenti aftur utan í og komst loksins inn á svalir á 12. hæð," segir Sóldis Elfa. "Það vissi enginn hvort hún var lífs eða liðin."

Að sögn Sóldísar Elfu hlupu hinir fallhlífarstökkvararnir til að leita að Mariu. Það tók dágóða stund því þeir vissu ekki á hvaða svölum hún var. "Eftir tuttugu mínútur eða svo komu þeir svo með hana út í hjólastól og hélt utan um hendina. Hún var sennilega handleggsbrotin," segir Sóldís Elfa.

Eins og gefur að skilja var fólkinu sem fylgdist með brugðið. "Það var mjög óþægilegt að horfa á þetta. Það voru allir með öndina í hálsinum. Þetta átti að vera skemmtun en breyttist næstum því í harmleik. Ég var að taka þetta upp á myndavélina en slökkti um leið og hún lenti utan í. Ég vildi ekki eiga þetta á myndbandi ef illa færi," segir Sóldís Elfa.

Atvikið átti sér stað degi áður en hjónin flugu aftur heim til Íslands. "Það voru allir mjög fegnir því að sjá hana koma út í hjólastólnum. Þetta fór betur en á horfðist. Ég væri sennilega enn í sjokki ef ég hefði ekki séð hana koma út."