Hætt verði að framleiða raforku fyrir álver með jarðvarmavirkjunum

Landvernd hefur sent frá sér yfirlýsingu vegna frétta af Hellisheiðarvirkjun þar sem meðal annars kemur fram að hætta eigi rafmagnsframleiðslu á jarðhitasvæðum til álvera og annarra orkufrekra framkvæmda.

„Þá erum við helst að tala við þetta ætlaða Helguvíkur álver sem mun krefjast mikillar jarðvarmanýtingar á Reykjanesskaga,“segir Guðmundur Hörður Guðmundsson, formaður Landverndar.

Hafa áhyggjur af áhrifum á heilsufar

Landvernd telur einnig að ekki eigi að ráðast í neinar frekari jarðvarmavirkjanir fyrr en búið verði að tryggja á fullnægjandi hátt að brennisteinsmengun hafi ekki áhrif á heilsu fólks og að gengið verði frá vandamálum tengdum förgun affallsvatns frá virkjunum.

„Það hafa komið fram vísbendingar um að brennisteinsvetnismengun hafi áhrif á heilsu fólks. Notkun á astmalyfjum eykst þegar brennisteinsvetnismengun mælist há á höfuðborgarsvæðinu. Það bendir allt til þess að brennisteinsvetnismengun hafi áhrif á fólk sem eru með astma og þessháttar. Það er aðallega það sem við erum að vísa í. Svo vantar bara mjög upp á rannsóknir í nágrenni við svona mikið þéttbýli þannig að það er verið að gera ákveðna tilraun sem við sjáum ekki fyrir endann á og hefði þurft að rannsaka betur áður," segir Guðmundur.

Þá hefur Landvernd áhyggjur af því hvaða áhrif affallsvatn kann að hafa á umhverfið eftir að því er dælt upp. „Þegar menn nýta jarðvarma kemur vatn upp úr jörðinni. Þetta vatn er mengað með allskonar eiturefnum úr jarðlögunum. síðan þarf að losa sig við þetta vatn. Vatninu er dælt niður aftur, en það hefur ekki gengið nógu vel. Vatnið seytlar þarna niður í hraunið og menn hafa áhyggjur af því að þetta kunni að hafa áhrif á grunnvatn,"

Guðmundur segir áhyggjuefni Landverndar þó fyrst og fremst lúta að því að margir óvissuþættir séu uppi og í ljósi þess sé ekki skynsamlegt að ráðast í frekari virkjanir á jarðvarma.