"Fólk má alveg vera á móti þessari keppni"

Fegurðarsamkeppnin Ungfrú Ísland verður haldin aftur í ár eftir að hafa fallið niður í fyrra. Keppnin hefur verið haldin allar götur síðan 1950 að undanskyldu árinu í fyrra samkvæmt Rafni Rafnssyni, sem stýrir framkvæmd keppninnar.

Nokkur styr hefur myndast í kringum keppnina og til að mynda hefur alþingismaðurinn Sigríður Ingibjörg Ingadóttir skráð sig til leiks í einskonar mótmælaskyni. Sigríður sagði í samtali við Vísi í dag: „Það vakti athygli mína að einhverjum skyldi láta sér detta í hug að endurvekja keppni um útlit kvenna árið 2013."

Um þetta segir Rafn: „Það er ekkert athugavert við það að henni finnist það. Við höfum öll mismunandi skoðanir, en við finnum fyrir miklum áhuga á keppninni og margir hafa hvatt okkur til að halda þetta í ár eftir að þetta hafði fallið niður í fyrra. Þetta hefur verið haldið svo til óslitið síðan 1950."

Misskilningur um aldurstakmarkið

Þá hefur vakið athygli að ekkert sérstakt aldurstakmark hefur verið auglýst í tengslum við keppnina. Rafn segir að þó að það hafi ekki verið gert gæti ákveðins misskilnings í umræðum um það. „Það er ákveðinn misskilningur að þó að það sé ekki búið að auglýsa það neitt sérstaklega séu ekki neinar viðmiðanir í keppninni. Keppnin heitir náttúrulega Ungfrú Ísland og hugmyndin með keppninni er að finna einstakling til að taka þátt í Ungfrú Heimur fyrir Íslands hönd."

Rafn bætir svo við: „Við höfum nú líka nokkrum sinnum unnið þá keppni og þá virðast allir vera vona ánægðir með keppnina. Inn í þessar fegurðarsamkeppnir erlendis er aldurstakmarkið oftast stelpur á bilinu 18 - 25 ára. En varðandi þetta aldurstakmark þá er vegna þess enginn tilgangur í því að taka inn umsækjendur sem eru utan þessa aldursbils, vegna þess að ef sigurvegari keppninnar væri utan aldursbilsins gæti hún ekki keppt í Ungfrú Heimur. Þess vegna er okkar viðmið 18 - 25 ára."

Allar umsóknir verða metnar

Aðspurður að því hvort hann telji suma þeirra sem hafa skráð sig í keppnina í gríni munu fá þáttökurétt segir Rafn. „Mér finnst mjög ólíklegt að sumir umsækjendurnir muni fá þáttökurétt í ljósi þess að aldursviðmiðið er 18 - 25 ára. Það er samt tekin ákvörðun um hvern einasta umsækjanda í inntökuferlinu. Ég get samt eiginlega ekki tjáð mig um einstaka umsóknir því það er ekki í mínum höndum. Við viljum samt ekki vera að leita að neinni staðalímynd, þetta er Ungfrú Ísland og við viljum hafa einhvern fjölbreytileika í keppninni."

Rafn kippir sér ekkert sérstaklega upp við gagnrýni í garð keppninnar. „Fólk má alveg vera á móti þessari keppni, það er ekkert mál. Það er fullt af fólki sem hefur áhuga á þessu og fylgist með keppninni ár eftir ár og þetta hefur verið haldið síðan 1950 við góðar undirtektir."

Keppnin verður haldin á Broadway 14. september næstkomandi.