"Guð minn góður, þetta getur ekki verið að gerast"

„Þegar ég kom á staðinn var verið að halda á stráknum mínum inn í sjúkrabílinn. Ég sá ekki strax hvort hann væri með meðvitund, en sá bara að hann var illa slasaður," segir Sigurbjörg Magnúsdóttir, móðir fimm ára gamals pilts sem féll af hestbaki eftir að ökuníðingur fældi hesta undan börnum á reiðnámskeiði í Garðabæ í gær.

Pilturinn, sem heitir Patrekur Trausti Jóhannsson og er fimm ára, var í dag færður af gjörgæslu og liggur nú á Barnaspítalanum eftir fallið. Hann er mikið marinn á bakinu og rauf meðal annars tvær rifur á lifrina. Þá hlaut hann einnig innvortis blæðingar.  

Þegar Sigurbjörg kom á staðinn í gær var Patrekur Trausti mikið kvalinn og átti erfitt með andardrátt.

„Svo var hann spurður hvort hann fyndi fyrir fótunum og hann sagði nei. Ég hugsaði bara, guð minn góður, þetta getur ekki verið að gerast," segir Sigurbjörg.

Nánar verður rætt við Sigurbjörgu í kvöldfréttum Stöðvar 2 klukkan 18:30 í kvöld.