8 ára drengur fær ekki bætur fyrir alvarlegt slys á skólatíma

VÍS var í vikunni sýknað af bótakröfu átta ára drengs sem hafði dottið ofan af vegg sem afmarkaði skólalóð Árbæjarskóla og lóð Árbæjarkirkju. 

Drengurinn hafði verið að leik í frímínútum í skólanum er hann prílaði upp á vegginn en hann datt svo af veggnum úr tveggja metra hæð með þeim afleiðingum að hann hlaut áverka og í kjölfarið varanlega örorku. Foreldrar drengsins stefndu VÍS til greiðslu skaðabóta en þeir töldu skólann bera ábyrgð á tjóni drengsins.

Foreldrarnir héldu því fram að skólanum hefið láðst að tryggja öryggi drengsins með því að setja ekki girðingu á vegginn og að ekki hefði verið haft nægt eftirlit með drengnum sem hefði leitt til þess að hann varð fyrir tjóninu og því væri skólinn ábyrgur fyrir tjóni drengsins.

Héraðsdómur Reykjavíkur féllst ekki á þessa röksemdafærslu foreldranna.

Ef foreldrarnir geta treyst barninu getur skólinn það líka

Í niðurstöðu dómsins segir meðal annars að eftir því sem börn eldist minnki nauðsyn þess að fylgjast stöðugt með þeim og það gildi ekki síður um skólann, þar sem börnin eru gjarnan á daginn.

Móðir drengsins upplýsti fyrir dóminum að drengurinn labbaði gjarnan sjálfur einn og án eftirlits heim á daginn eftir skóla. Dómurinn virðist byggja niðurstöðu sína á þessari staðreynd að einhverju leyti, en í niðurstöðu hans segir:

„Stefnandi hafi [venjulega innsk. blm.] ekki verið sóttur í skólann heldur gengið einn heim eftir að skóla lauk klukkan rúmlega tvö og að öðru jöfnu þá verið einn heima þar til móðir hans hafi komið úr vinnu sinni sem lokið hafi um klukkan þrjú."

Þá segir einnig: „Við mat á því hvort það verði talið starfsmönnum skólans til sakar að hafa ekki haft sérstakar gætur á stefnanda til að koma í veg fyrir að stefnandi og félagi hans færu að kirkjunni í frímínútum verður ekki litið fram hjá því sem fram kom fyrir dóminum af hálfu móður stefnanda um mat hennar á hæfi hans og þroska til að gæta sín sjálfur án eftirlits á þeim slóðum þar sem slysið varð."

Niðurstaðan varð því sú að drengurinn var sjálfum gert að bera skaðann af tjóninu.

Dóminn í heild sinni má lesa hér.