Skokkhópur "sló skjaldborg um tryppið"

Fjölmennt lið lögreglu var sent í Ártúnsbrekkuna eftir að hestur sást þar á beit í vegkantinum. Skokkhópur sem átti leið hjá aðstoðaði lögreglu við að fanga hestinn.

Um var að ræða merina gleði frá Ártúni sem slapp úr girðingu á Árbæjarsafninu en lögreglu gekk greiðlega að handsama hana og koma aftur til síns heima með aðstoð skokkhóps sem átti leið hjá vettvanginum. Engin slys urðu á fólki, hesturinn er ómeiddur og engar tafir urðu á umferð vegna atviksins.

Ólafur H Knútsson varðstjóri hjá umferðardeild lögreglunnar á höfuðborgarsvæðinu segir hrossið hafa verið á beit við Rafstöðvarveg: „Hann var á beit bara þarna við Ártúnsbrekkuna neðan við kartöflugeymsluna þar sem beygt er af Ártúnsbrekku og inn á Rafstöðvarveg. Þar er svona smá horn sem er með trjám og hann var þar. Mesta hættan var náttúrulega að hann hlypi inn á Ártúnsbrekku,“ segir Ólafur.

Lögreglumenn á vakt voru sendir á vettvang en skokkhópur kom á vettvang og aðstoðaði lögreglu:

„Þeir fóru strax í það að koma í veg fyrir að hrossið hlypi út í morgunumferðina. Það var mesta hættan. Þessi skokkhópur slógu bara skjaldborg utan um tryppið."

Aðspurður að því hvort einhverjar tafir hafi orðið á umferð segir Ólafur: „Það urðu engar tafir á umferð, hann er kominn inn í girðingu."