Íslenskur nemi vitni að ráninu: "Ég vona bara að þeir hafi ekki meitt neinn"

„Við erum bara heppnar að hafa ekki verið komnar lengra inn í búðina þegar þetta gerðist. Maður veit aldrei hvað svona menn gera og hvort þeir voru heilir í hausnum – þeir voru það pottþétt ekki," segir Jórunn Káradóttir, 24 ára arkitektúrnemi í London, sem var viðstödd ránið í versluninni Selfridges í miðborg London í gær, þar sem hópur búrkuklæddra karlmanna ruddist inn, braut glerborð með öxum og höfðu á brott með sér mikið magn af skartgripum.

Jórunn segist hafa verið grunlaus á gangi með breskri skólasystur sinni á veitingatorgi verslunarinnar, þar sem engin öryggisgæsla sé, enda engu að stela.

„Þá ýtir einhver við mér og er augljóslega mikið að flýta sér inn. Ég lít við og sé að viðkomandi er í búrku og það sést ekki í neitt nema augun. Samt var þetta greinilega karlmaður, í joggingbuxum og karlmannsskóm,“ segir Jórunn.

„Síðan kemur annar hinum megin við mig og heldur á risastóru barefli. Svo mæta þrír í viðbót og þeir eru allir í búrkum. Einn þeirra heldur á einhverju undir búrkunni.“

Jórunn segir að fyrst um sinn hafi sárafáir tekið eftir nokkru óeðlilegu. „Fljótlega var fólk farið að veita þessu athygli og ég stoppaði bara og fraus af því að þetta var auðvitað ekki eðlilegt. Starfsmaður spurði mig hvort þetta hefðu ekki örugglega verið karlmenn, og ég sagði jú og bætti við að þeir væru pottþétt að fara að ræna búðina. Þá „panikkuðu“ allir og hlupu út. Nokkrum mínútum seinna voru vopnaðar löggur alls staðar.“

Jórunn stökk á flótta eins og aðrir og eftirleikinn þekkir hún lítið nema þá helst úr fjölmiðlum. „Við löbbuðum reyndar aftur þarna fram hjá seinna og þá sáum við barnavagn á hvolfi og glerbrot alls staðar. Ég vona bara að þeir hafi ekki meitt neinn.“

Hún segist búin að jafna sig þótt lífsreynslan hafi að sjálfsögðu fengið á hana. „Þetta er svolítið sjokk, svona eftir á. Maður spyr sig: Var þetta í alvörunni að gerast?“