Laga gönguleiðina á Esjunni

Þessa dagana er verið að sinna árlegu viðhaldi á gönguleiðinni upp Esjuna. Bresku sjálfboðaliðarnir á myndinni leggja á sig mikið erfiði við burð á stórgrýti til að laga steinþrep og frárennsli við stíginn, segir í tilkynningu frá Skógræktarfélagi Íslands.

Sjálfboðaliðarnir (Iceland Conservation Volunteers) eru ráðnir beint af Umhverfisstofnun og hafa komið til Íslands undanfarin sumur til að sinna viðhaldi og dýrmætum úrbótum á friðlýstum svæðum og útivistarperlum Íslands.

Skógræktarfélag Reykjavíkur hefur umsjón með útivistarsvæði Esjuhlíða í samstarfi við Reykjavíkurborg og Rannsóknarstöð Skógræktar Ríkisins á Mógilsá.