"Hann gerði svo margt gott"

Hinni ernu og bráðskemmtilegu Þórunni Franz brá nokkuð í brún þegar hún sat og horfði á Stöð 2 nýlega og sá allt í einu gömlu myndbroti af föður sínum bregða fyrir í maltauglýsingu. Myndina fékk hún afhenta í morgun og Hrund Þórsdóttir fékk að líta í heimsókn til hennar og manns hennar, Hallgríms Jónssonar.

Hallgrímur fæddist á Bessastöðum á Álftanesi og var mikill frjálsíþróttakappi. Hann varð margfaldur Íslandsmeistari í kringlukasti auk þess sem hann var í landsliði Norðurlandanna. Verðlaunapeningar hanga innan um fallegt handverk sem Þórunn hefur búið til í gegnum tíðina.

Fulltrúi Ölgerðarinnar afhenti Þórunni mynd úr myndbrotinu af föður hennar, en það hafði hún aldrei séð þar til það birtist í maltauglýsingunni góðu.

„Ég var náttúrulega voðalega glöð því mér fannst að það mætti ekki gleyma honum því hann gerði svo margt gott,“ segir Þórunn.

Frans sterki Arason, eins og faðir Þórunnar var kallaður, var aðeins tíu ára þegar hann fór á sjó ásamt vinum sínum. Veður tók að versna og fólk fór að óttast um þá félaga en þeir skiluðu sér í land.

„Það átti nú aldeilis að taka þá og rassskella þá en það var hætt við það, því það var svo mikill fiskur í bátnum. Og þá var það sem afi fór og lét byggja nýjan bát og hann fékk hann þegar hann var tíu ára gamall,“ segir Þórunn.

Hún talar afar hlýlega um föður sinn, sem var ötull við að deila afla sínum með efnaminni samborgurum og bjargaði mönnum frá drukknun. Einn þeirra, Helgi, átti eftir að eignast mörg börn og þau áttu ljósmynd af bjargvætti föður síns.

„Og mamma þeirra lét þau alltaf kyssa myndina af pabba áður en þau fóru að sofa.“

Hin fjölhæfa Þórunn stofnaði Félag íslenskra dægurlagahöfunda ásamt fleirum og sjálf er hún lunkið tónskáld sem á meðal annars lög sem Raggi Bjarna gerði vinsæl. Lagið Farmaður hugsar heim samdi hún til föður síns.

„Ég bjó það lag til pabba míns og þá var ég litla stelpan sem kom dansandi eftir öldunni til hans og kyssti hann á kinnina,“ segir Þórunn að lokum.