Rúmenskur skartgripaþjófur áfram í gæsluvarðhaldi

Hæstiréttur Íslands staðfesti í dag gæsluvarðhaldsúrskurð yfir meintum stórglæpamanni sem var handtekinn á Keflavíkurflugvelli í lok mars. Maðurinn kom ásamt tveimur félögum sínum til landsins skömmu fyrir páska en það vakti athygli tollvarða að mennirnir voru með sérstakan segul á sér sem er oft notaður til þess að gera þjófavarnir í verslunum óvirkar.

Við nánari eftirgrennslan kom í ljós að maðurinn, sem er rúmenskur að uppruna, væri eftirlýstur af Interpol fyrir rán og líkamsárás á Kýpur á síðasta ári. Hann á að hafa brotist inn í skartgripaverslun í borginni Nikósíu og stolið þaðan skartgripum fyrir 32 milljónir króna.

Þá á hann í sömu borg að hafa ráðist á verslunarstjóra stórmarkaðar og gengið harkalega í skrokk á honum auk þess sem hann og félagi hans eiga að hafa rænt hann uppgjöri verslunarinnar, sem var um tvær og hálf milljón króna. Fórnarlambið var illa farið eftir ránið og þurfti að leggjast inn á sjúkrahús í kjölfarið.

Við meintum afbrotum liggur að hámarki lífstíðarfangelsi samkvæmt kýpverskum lögum. Stjórnvöld þar í landi hafa þegar óskað eftir að maðurinn verði framseldur.

Maðurinn verður í gæsluvarðhaldi til 28. maí næstkomandi. Mennirnir hafa lítil sem engin tengsl við land og þjóð eftir því sem rannsakendur komast næst.