Innlent

Píratar segjast jafn undrandi á fréttum af sjóræningjasíðunni og aðrir

Píratar hafa sent frá sér tilkynningu þar sem þeir árétta að skráaskiptisíðan thepiratebay.is sé ekki á vegum flokksins, og segjast þeir jafn undrandi á þessum fréttum og aðrir.

Eins og Vísir greindi frá í morgun opnaði síðan undir íslenska léninu í morgun en einn af stofnendum síðunnar er skráð fyrir léninu hér á landi.

Framkvæmdastjóri SMÁÍS sagði í viðtali við Vísi í dag að hann teldi vera kosningalykt af opnun síðunnar sem var nátengd Píratahreyfingunni alþjóðlegu sem dregur nafn sitt af síðunni.

Í tilkynningu frá Pírötunum segir svo orðrétt:

Píratar vilja koma því á framfæri að thepiratebay.is er ekki á vegum flokksins og eru jafn undrandi og aðrir á þessum fréttum. Engu að síður vilja Píratar vekja máls á því að á thepiratebay má finna mikið magn efnis, kvikmynda, heimildamynda, bóka, tónlistar og leikja sem gefið hefur verið út undir opnum leyfum, svo sem Creative Commons (CC). Píratar vilja hvetja almenning til að nýta sér opna menningu á netinu til jafns við aðkeypt menningarefni.



Meðal þeirra höfunda sem gefið hafa efni sitt út undir merkjum (CC) er Paulo Coelho. Hann er einnig einn þekktasti og dyggasti stuðningsmaður síðunnar, enda bauðst hann til að bera vitni til handa stofnendum hennar þegar þeir voru færðir fyrir dóm í Svíþjóð.

“Since the dawn of time, human beings have felt the need to share – from food to art. Sharing is part of the human condition. A person who does not share is not only selfish, but bitter and alone." -Paulo Coelho.

Píratar vilja einnig minna fólk á að kynna sér reglur um höfundarétt og fara að þeim í einu og öllu.


Tengdar fréttir

Sjóræningjarnir eru komnir: Umdeildasta skráarskiptasíða veraldar orðin íslensk

Stærsta skráarskiptasíða veraldar, og jafnframt sú umdeildasta, thePiratebay, er orðin íslensk. Þetta kemur meðal annars fram á erlendum fréttasíðum sem fjalla um tölvur og tæknimál, auk þess að ef slegin er inn vefslóðin, má sjá glögglega að núna er piratebay ekki lengur með endinguna se, eins og undanfarin ár, heldur is.

Lokar ekki léninu nema að undangengnum dómsúrskurði

"Til þess að loka lénum, þá lýsum við því yfir eins og þegar reynt var að loka Wikileaks á sínum tíma, að við munum aldrei loka á síður nema að undangengnum dómsúrskurði,“ segir Jens Pétur Jensson, framkvæmdastjóri Internet á Íslandi sem sér um skráningu .is léna á Íslandi, spurður hvort til standi að svipta skráaskiptasíðuna Thepiratebay léni sínu, sem nú er íslenskt.

Segir kosningalykt af opnun sjóræningjasíðunnar

"Mín tilfinning er sú að þetta sé mjög sérstök tímasetning, svona rétt fyrir kosningar,“ segir Snæbjörn Steingrímsson, framkvæmdastjóri SMÁÍS, samtaka myndréttarhafa á Íslandi, um þau tíðindi að umdeildasta og mest notaðasta skáarskiptasíða veraldar, Thepiratebay, sé nú komin með íslenskt lén.

Mest lesið


Fleiri fréttir

Sjá meira


×

Mest lesið