Hitti "Ozzy Osbourne" í Cannes

Austurríski ofurhuginn Felix Baumgartner, sem vakti athygli heimsbyggðarinnar á dögunum þegar hann rauf hljóðmúrinn í frjálsu falli úr 39 kílómetra hæð, vakti bæði kátínu (og mögulega reiði) þungarokkara í vikunni þegar hann birti mynd af sér á Facebook með við hlið heimsþekktrar rokkstjörnu á sjónvarpsráðstefnu í Cannes.

Undir myndinni stóð „Vitið þið hvern ég hitti í Cannes? Ozzy Osbourne! Hrikalega svalur gaur og ég elska tónlistina hans. Rokk og ról!“

Færslan hefði í sjálfu sér ekki verið í frásögur færandi nema vegna þess að maðurinn á myndinni var ekki rokksöngvarinn Ozzy Osbourne, heldur Gene Simmons, bassaleikari Kiss.

Aðdáendur ofurhugans hófu strax að gera grín að honum fyrir mistökin og einn hafði orð á því að sennilega hefði Baumgartner „gleymt heilanum í himingeimnum“.

Daginn eftir skrifaði Baumgartner um færsluna og sagði hana verið grín. Máli sínu til stuðnings benti hann á eldri færslu sem fjallaði um fyrirhugaða ráðstefnu, en í fyrirsögn hennar kom einmitt fram að meðal gesta á ráðstefnunni væru þeir Felix Baumgartner og Gene Simmons.

„Til hamingju öll þið sem föttuðuð brandarann,“ skrifaði Baumgartner, og kvittaði undir „Felix og Gene“.