Ekki fara í megrun

Jóhanna Þórarinsdóttir ÍAK einkaþjálfari og norðurlandameistari í bekkpressu sem heldur úti vefsíðunni www.fitnessform.is vill að orðið megrun verði fjarlægt úr orðaforða Íslendinga. Hér gefur Jóhanna lesendum Visis góð ráð til að bæta heilsuna.

Megrun - nei takk!

Ekki fara í megrun. Þetta orð má taka út úr orðaforða Íslendinga. Borða hreint, hollt og gott mataræði. Breyttar matarvenjur og gott mataræði stuðlar að meiri orku, jafnari blóðsykri og minni sætindalöngun. Flestir sem koma til mín í þjálfun tala um mikið orkuleysi og í flestum tilfellum lögum við það með betra mataræði. Byrjum daginn á hollum og trefjaríkum morgunverði.

Minni máltíðir - oftar

Borða fleiri og minni máltíðir yfir daginn, efnaskipti og brennsla verður hraðari og okkur gengur betur að léttast. Ekki láta líða of langt á milli mála og hæfilegur tími getur verið um 2-4 tímar á milli, sem er þó einstaklingsbundið. Magi og melting ráða illa við stórar máltíðir sem veldur meltingarörðuleikum og blóðsykur fer oft á flakk sem veldur "nammiþörf" þrátt fyrir að hafa borðað stóra máltíð. Einnig líður þá of langt á milli máltíða og brennslan hjá okkur minnkar.

Vatnsdrykkjan er mikilvæg

Vatn er mikilvægasta næringarefni líkamans. 55-til 60% líkamsþyngdar fullorðins einstaklings er vatn. Nauðsynlegt er að endurnýja þá tvo til þrjá lítra sem tapast á dag í formi svita, þvags og útöndunar. Oft er gott að byrja daginn á að fá sér vatnsglas þegar þið vaknið og gott að setja lime eða sítrónu út í til að hjálpa við hreinsun. Hafa brúsa með sér í vinnuna og mikilvægt að drekka vatn á æfingu, þá hefur maður aukna orku og betra úthald til að endast lengur í æfingum.

Nauðsynleg vítamín

Ferskir ávextir og grænmeti; Komum því fyrir í flestar máltíðar yfir daginn. Ávextir og grænmeti veita okkur nauðsynleg vítamín, andoxunarefni og trefjar sem flestir Íslendingar eru ekki að fá nóg af. Mæli með að velja mikið af grófu og litríku grænmeti. Brokkolí og blómkál minnka til dæmis líkur á krabbameini.

Beint úr náttúrunni

Borðum matinn okkar næst því sem hann kemur úr náttúrunni. Minnka unninn mat og mat sem er búið að hrúga allskyns aukaefnum í. Gott að borða magurt kjöt, fisk, egg, hnetur, möndlur og fituminni mjólkurvörur. Þeir sem borða brauð og pasta ættu að velja gróft og trefjaríkari kornvörur.

Mundu að hreyfa þig

Hreyfum okkur sem mest í dagsdaglegu lífi, það gerir gæfu mun og auka dags daglega hreyfingu, nota stiga, leggja bílnum lengra frá og kíkja í fleiri gögnutúra, skokk eða hlaup allt þetta hefur mikil áhrif á heilsuna. Auk þess að fara í ræktina og taka vel á því fyrir þá sem vilja hámarka fitubrennslu og bæta styrk.

Svefninn ekki síður mikilvægur

Svefn skiptir gríðalega miklu máli. Svefn er mikilvægur eðlilegri líkamsstarfsemi og góðri heilsu. Svefnleysi getur valdið vanlíðan og þreytu á daginn, og langvarandi svefnleysi eykur hættuna á ýmsum kvillum. Þeir sem sofa of lítið ná minni árangir í líkamsrækt og eiga meiri hættu á að fitna.

Hugurinn ber þig hálfa leið

Hugarfarið skiptir öllu máli. Vakna jákvæður, hugsa jákvætt, líta upp til sín og hafa sjálfstraust. Hugurinn ber okkur hálfa leið og útgeilsun fer ekki eftir holdarfari. Ef þú mætir í ræktina og hugsar: Ég get aldrei náð árangir saman hvað ég reyni er örugg leið til að mistakast. Ég ætla, ég skal og ég get er rétta hugsunin, að lifa í núinu og taka einn dag í einu. Sama hvort maður detti útaf brautinni öðru hvoru gerum það með stæl og komum tvíelfd til baka.

Jóhanna byrjar með nýtt og spennandi námskeið í World Class á mánudaginn sem ber yfirskriftina Hámarksbrennsla.

"Ég verð með þetta námskeið í Ögurhvarfi og þar verður takið vel á því og mikið fjör í skemmtilegum hóp. Við leggjum áherslu á brennslu, styrk, aðhald, mælæingar, matarprógram, fræðslu og þrekpróf. Áherslan er að ná árangri í sumar."

Þeir sem skrá sig fá aðgang af öllum stöðvum World Class og þeir sem eiga kort fá afslátt af námskeiðinu. Nánari upplýsingar hér.