Fullkomin óvissa um stjórnarskrána

Fullkomin óvissa ríkir um það hvort nokkur breyting verður gerð á stjórnarskránni áður en alþingismenn yfirgefa þingið og halda í kosningabaráttu fyrir kosningarnar í næsta mánuði. Leiðtogar flokkanna reyna að ná samkomulagi og á meðan liggja allir fundir niðri á Alþingi

Umræðum um stjórnarskrárfrumvarp formanna Samfylkingar, Vinstri grænna og Bjartrar framtíðar, með breytingartillögum frá meirihluta stjórnlaganefndar Alþingis, var hætt um kvöldmatar leytið í gær, eftir að hafa staðið meira og minna í tvo daga. Þetta var gert til að ljúka mætti annarri umræðu um ýmis mál sem sæmileg samstaða ríkir um að klára fyrir þinglok, þannig að þau kæmust til þriðju og síðustu umræðu á Alþingi. Nokkrar vonir voru þá bundnar við að samkomulag gæti tekist um hvernig ljúka ætti stjórnarskrármálinu, en svo reyndist ekki vera.

Greina mátti nokkurn samningsvilja hjá þingmönnum Sjálfstæðisflokksins í umræðum í gær, en Framsóknarmenn virðast vera algerlega þverir fyrir og leggjast gegn öllum breytingum á stjórnarskránni, hvort sem það er breytingarákvæðið sjálft, þannig að tryggja megi að Alþingi geti haldið málinu áfram á næsta kjörtímabili og gert breytingar á stjórnarskránni án þess að boða þá þegar til kosninga, eða ákvæði um auðlindir í þjóðareign. Það flækir svo málið enn frekar að Margrét Tryggvadóttir hefur lagt fram frumvarp um heildarendurskoðun á stjórnarskránni eins og það lítur út eftir afgreiðslu stjórnlaganefndar Alþingis, sem breytingartillögu við formannafrumvarpið.

Það hefur verið gagnrýnt bæði af andstæðingum heildarendurskoðunar stjórnarskrárinnar sem og mörgum stuðningsmönnum, á þeim forsendum að þá væri verið að samþiggja nýja stjórnarskrá í formi breytingartillögu, án greinargerðar og lögskýringa. Margir stuðningsmenn heildarendurskoðunar hafa sagt að það sé ekki sæmandi svo mikilvægu máli en í þeim hópi eru t.d. Ögmundur Jónasson innanríkisráðherra og Björgvin G. Sigurðsson þingmaður Samfylkingarinnar. Þessi hnútur gæti því leitt til þess að engar breytingar verði gerðar á stjórnarskránni.

Heimildir herma að margir Sjálfstæðismenn og Framsóknarmenn óttist atkvæðagreiðslu um breytingartillögu Margrétar, því hún geti hugsanlega leitt fram meirihluta fyrir heildarendurskoðun stjórnarskrárinnar með þeim hætti sem að framan greinir. Þingflokkar stjórnarflokkanna koma saman til sameiginlegs fundar klukkan eitt og í framhaldinu skýrist hvort og þá hvenær leiðtogar allra flokka á Alþingi komi saman til fundar.