Bjóða þingmönnum upp á bjór

Í tilefni þess að 24 ár eru liðin frá því að sala bjórs var gerð heimil á Íslandi býður Stúdentakjallarinn öllum þeim þingmönnum sem sæti áttu á Alþingi 1. mars 1989 upp á einn ískaldan.

Meðal þeirra þingmanna sem sæti áttu á Alþingi á þessum tíma voru núverandi forseti Íslands Ólafur Ragnar Grímsson, Jóhanna Sigurðardóttir, Steingrímur Jóhann Sigfússon og Þorsteinn Pálsson.

Á Fésbókarsíðu Stúdentakjallarans, sem opnaði á nýjan leik í kjallara Háskólatorgs á dögunum, kemur fram að deilt hafi verið um hvort leyfa skildi bjórinn í gamla Stúdentakjallaranum við Hringbraut.

„...en þar höfðu m.a. nokkrir stúdentar tekið upp á því að blanda „bjórlíki". Ekkert í þá líkingu er þó í boði í nýja Stúdentakjallaranum við Háskólatorg - en af nógu öðru er þó þar að taka," segir á Fésbókarsíðu Stúdentakjallarans. Áréttað er að allir séu velkomnir í Stúdentakjallarann og öllum Íslendingum óskað til hamingju með daginn.