„Þetta er skemmtun fyrir börnin okkar“

Móðir tíu ára handknattleiksstúlku skrifaði í gær pistil um slæma hegðun foreldra á leik á dögunum, en meðal annars voru mótherjar stúlkunnar hvattir til að taka af henni gleraugun.

Pistillinn, sem Halldóra Ingvarsdóttir skrifar, hefur vakið athygli í netheimum og segir Halldóra megintilgang skrifanna vera að opna umræðu um hlutverk foreldra barna í íþróttum.

„Þetta er ekkert eina atvikið og ekki það versta," segir Halldóra, og segir pistilinn hafa ferðast víðar en hana hafði grunað. „Það kannski segir manni að þetta er þörf umræða."

Í pistlinum segir hún foreldra stúlku í hinu liðinu hafa kallað oftar en einu sinni, eftir að dóttir Halldóru skoraði, eftir því að gleraugun yrðu tekin af henni. Að leik loknum ræddi Halldóra við þjálfara andstæðinganna, sem hún segir eiga mikið hrós skilið fyrir að hafa tekið vel á málunum.

Þó hafi fólkið haldið áfram að hafa sig í frammi, og hafi kona meðal annars gengið upp að sér og spurt hvort hún væri „ennþá að grenja".

Segir Halldóra dóttur sína ekki hafa skilið hvers vegna fullorðið fólk væri að biðja um að gleraugun væru tekin af henni, en mæðgurnar ætla þó ekki að láta atvikið slá þær út af laginu.

„Ég ber engan kala til félagsins sem þessir foreldrar tilheyra. Ég vil ekki tilgreina hvaða félag þetta er enda skiptir það engu máli. Þetta er skemmtun fyrir börnin okkar."

Hér má lesa pistilinn í heild sinni.