Björgunarsveit aðstoðaði 17 manns á þremur bílum

Björgunarsveit Landsbjargar á Hólmavík var kölluð út í gærkvöldi til að aðstoða 17 manns í þremur bílum á Steingrímsfjarðarheiði. Þar var bandvitlaust veður og sá ekki út úr augum.

Ökumennirnir áræddu ekki að halda áfram þótt vegurinn væri fær, og kölluðu eftir hjálp. Björgunarmennirnir fluttu fólkið til Hólmavíkur, þar sem það dvaldi í nótt.

Víða var mjög hvasst á Vestfjörðum í gærkvöldi og fram á nótt, en heldur hefur dregið úr vindinum. Veðurstofan býst við norðan- og norðaustan hvassviðri eða stormi víða um land  en heldur hægari sunnan- og suðaustan lands.

Þá er spáð ísingu á grunnslóð allt frá Látrabjargi austur til Langaness, sem er fátítt. Eftir langþráða hláku fór aftur að snjóa á Akureyri í nótt og undir morgun hafði fallið þar hátt í tíu sentímetra jafnfallinn snjór.