Ný loðnutorfa fannst út af Hornafirði

Þó nokkur loðnuskip eru út af Hornafirði, eftir að hafa verið komin vestur fyrir Vestmannaeyjar fyrir helgi.

Fregnir herma að ný torfa hafi fundist út af Hornafirði, líklega sú sem var í grennd við Grímsey fyrir hálfum mánuði.

Skipin eru í skjóli fyrir norðanáttinni og geta athafnað sig, en mikið kapp er nú á loðnusjómönnum þar sem um það bil þriðjungur er enn eftir af kvótanum.

Loðnan hefur verið óvenju dreifð á þessari vertíð og því hafa skipin þurft að kasta marg oft til að fylla sig.