Vonskuveður á landinu | Vegurinn um Námaskarð lokaður

Á Norðurlandi er stórhríð og óveður og lítið ferðaveður. Útlit er fyrir áframhaldandi vonskuveður um landið norðanvert í kvöld. Víðast er mikið kóf og skafrenningur. Veginum um Námaskarð hefur verið lokað ótímabundið vegna umferðaóhapps.

Í tilkynningu frá Vegagerðinni kemur fram að ófært sé á Þverárfjalli, Vatnsskarði, Siglufjarðarvegi, Héðinsfirði, Ólafsfjarðarmúla, Dalvíkurvegi, Grenivíkurvegi, Víkurskarði, Hólasandi og Hófaskarði. Þæfingur og stórhríð er á Öxnadalseiði og í Ljósavatnsskarði. Hálka eða snjóþekja er á flestum öðrum leiðum, stórhríð og óveður.

Slæmt ferðaveður og færð er á Vestfjörðum. Ófært er á Steingrímsfjarðarheiði, Þröskuldum og Klettshálsi. Hálka og skafrenningur er svo á Mikladal og Hálfdán. Hálka er einnig á Kleifaheiði. Þæfingur og skafrenningur er frá Súðavík í Mjóafjörð en þungfært í Ísafirði. Stórhríð er í Önundarfirði, Súðavíkurhlíð og í Reykhólasveit.

Á Austurlandi er þæfingur og stórhríð á Háreksstaðaleið og á Vopnafjarðarheiði en snjóþekja og óveður á Möðrudalsöræfi. Þá er ófært og stórhríð á Fjarðarheiði og ekkert ferðaveður. Hálkublettir og skafrenningur eru á Fagradal en hálkublettir og éljagangur á Oddsskarði annars er komið víða snjóþekja og stórhríð á Héraði. Greiðfært er með ströndinni til Reykjavíkur.

Austantil á Norðurlandi og á Austfjörðum gengur vindur aðeins niður í nótt austantil, en áfram verður stormur eða um og yfir 20 m/s til fjalla vestantil á Norðurlandi og á Vestfjörðum suður um í Dali og á Snæfellsnesi. Á Kjalarnesi má reikna með hviðum, 30-35 m/s, fram á kvöldið og á sunnanverðu Snæfellsnesi til fyrramáls.

Færð og aðstæðurHálkublettir eru á Lyngdalsheiði og Laugarvatnsvegi en annars eru vegir að mestu auðir á Suðurlandi, óveður er á Kjalarnesi.

Á Vesturlandi er hálka eða hálkublettir nokkuð víða, él og skafrenningur. Hálka og óveður er á Bröttubrekku, Holtavörðuheiði og í Staðarsveit. Hálka og skafrenningur er um Fróðárheiði. Ófært og óveður er í Svínadal og lítið ferða veður.