Dæmdur fyrir að taka Ráðherrabústaðinn eignarnámi

Karlmaður var í gær dæmdur í 30 daga skilorðsbundið fangelsi til tveggja ára í Héraðsdómi Reykjavíkur fyrir að brjótast inn í Ráðherrabústaðinn í ágúst og september á síðasta ári.

Við aðalmeðferð málsins viðurkenndi maðurinn þá háttsemi sem honum er gefin að sök í ákæru, en neitaði sök og kvaðst ekki telja að um refsiverðan verknað hefði verið að ræða.

Kvaðst hann telja sig vera réttmætan eiganda húseignarinnar. Hann kvaðst hafa haft uppi fékröfu á hendur íslenska ríkinu vegna eineltis og margs konar brota embættismanna gagnvart sér. Krafan var 14,7 milljónir evra - sem jafngildir röskum tveimur milljörðum króna.

Maðurinn, sem hefur nokkrum sinnum komist í kast við lögin, meðal annars fyrir ofbeldisbrot, er heimilislaus. Fyrir þar síðustu jól tók hann reyndar upp á því að skrá lögheimili sitt í Ráðherrabústaðinn, en hver sem er getur skráð lögheimili sitt hvar sem er, svo lengi sem það er í íbúðarhúsnæði. Fjárkröfu á hendur manninum upp á rúma hálfa milljón var vísað frá.