Varað við mannskæðum snjóflóðum

Veðurstofan varar ferðafólk utan alfaraleiða við snjóflóðum, sem gætu reynst mannskæð, en hvergi er alvarleg snjóflóðahætta í byggð.

Vitað er um nokkur flóð sem fallið hafa úr giljum að undanförnu, og það stærsta féll í Merkigili, norðan Dalvíkur á sunnudag. Það var mælt þrjú stig, en snjóflóð af þeirri stærðargráðu geta eyðilagt fólskbíl, eða grafið vörubíl, skemmt hús eða eyðilagt minni byggingar, samkvæmt skilgreiningu Veðurstofunnar. Slík flóð geta að sjálfsögðu verið mannskæð. Veðurstofan telur að mikil snjóflóðahætta sé á norðanverðum Vestfjörðum og á Tröllaskaga, eða í Fjallabyggð, og töluverð hætta á Austfjörðum. Það skýrist af því að nýi snjórinn binst illa við snjóinn, sem var fyrir.

Að sögn Hörpu Grímsdóttur, útibússtjóra Snjóflóðaseturs Veðurstofunnar, beinast þessar viðvaranir fyrst og fremst að ferðafólki, utan alfaraleiða, því það getur með yfirferð sinni, sérstaklega á vélsleðum, hleypt snjóflóðum af stað, einkum úr giljum, þar sem ótryggur snjór hefur náð að safnast upp.