Stórhríð og kolófært víða á landinu

Vonskuveður er á Suðurlandi og víðast hvar ekki ferðaveður. Ófært er bæði á Hellisheiði og í Þrengslum og er fólk eindregið beðið að hlíta tilmælum lögreglu um að reyna ekki að fara þar um.

Stórhríð er á Kjalarnesi og ekki ferðaveður. Það er hálka og mikil ofankoma á höfuðborgarsvæðinu og sömuleiðis á Reykjanesbraut og Suðurnesjum, að því er segir í tilkynningu frá Vegagerðinni.

Stórhríð er við Akrafjall og í Hvalfirði, og eins er glórulaus stórhríð við Hafnarfjall. Hálka eða hálkublettir eru annars á köflum á Vesturlandi ásamt skafrenningi og ofankomu.

Á Vestfjörðum er ekkert ferðaveður, fjallvegir eru flestir ófærir og víða þungfært í byggð.

Mjög slæmt veður er einnig á Norðurlandi. Stórhríð er milli Blönduóss og Skagastrandar, við utanverðan Skagafjörð og á Tröllaskaga. Stórhríð er einnig á Öxnadalsheiði, Víkurskarði og Tjörnesi og óveður áfram þaðan austur með ströndinni.

Ófært er bæði á Hófaskarði og Brekknaheiði.

Þæfingsfærð er á Vopnafjarðarheiði og verið að hreinsa. Snjókoma er á Fjarðarheiði og þæfingsfærð en hálka á Fagradal og éljagangur og Oddsskarði.

Óveður er í Öræfum og ekki ferðaveður.