Foreldrar gætu þurft að sækja börnin í skólann eftir hádegi

„Skólastarfi hefur ekki verið aflýst. Það er einhver starfsemi í öllum skólum, en þó af skornum skammti," segir Jón Viðar Matthíasson, slökkviliðsstjóri höfuðborgarsvæðisins.

Ekkert ferðaveður er nú á höfuðborgarsvæðinu, skyggni ekkert og allt meira og minna stopp.

Ragnar Þorsteinsson, sviðsstjóri skóla- og frístundstarfs hjá Reykjavíkurborg, segir að grunnskólum og leikskólum sé aldrei lokað. „Það er foreldrana sjálfra að meta það hvort að þeir senda börnin í skóla," segir hann.

Jón Viðar segir að veðrið sé í takt við veðurspánna í gær. „Við þurfum svo að meta það þegar það líður á daginn hvort að foreldrarnir þurfi að sækja börnin í skólann. Það gæti vel verið að við óskum eftir um hádegisbil, að þeir geri það."

Skólarnir munu þó ekki loka fyrr en allir nemendur eru komnir heim. „Skólarnir verða opnir eins lengi og þeir geta og hleypa engum út fyrr en það er hægt," segir hann.

Staðan verður metin aftur á hádegi.