Innanlandsflug í uppnámi - millilandaflug á áætlun

Öllu innanlandsflugi hefur verið frestað eða aflýst í dag samkvæmt upplýsingum sem finna má á heimasíðu Isavia. Flug til Akureyrar og Egilsstaða verður endurskoðað um hádegisbilið. Flugi til Ísafjarðar hefur verið aflýst.

Millilandaflug verður hinsvegar með óbreyttum hætti samkvæmt tilkynningu frá Isavia. Allri umferð inn og út úr flugstöðinni er beint um innganga í innritunarsal á vesturhlið hússins en dyrum komusalar á austurhlið hússins hefur verið lokað á meðan veðrið gengu yfir.

Farþegar eru beðnir að mæta tímanlega til innritunar.

Þá hefur flugfélagið Ernir ekki getað flogið innanlands í dag vegna veðurs. Búið er að aflýsa flugi á Húsavík og Bíldudal en athugað verður með flug til Vestmannaeyja og Hafnar í Hornafirði kl 12:15.

Ekki er mikið útlit fyrir að flogið verði innanlands í dag og verður tekin endanleg ákvörðun um framhald flugs í dag um hádegið hjá Erni. Fólk er hvatt til að fylgjast með upplýsingum um flug Ernis á síðu 424 í textavarpi.