Slökkviliðsmenn óku fram á ökumann í vanda

Slökkviliðsmenn voru í óða önn að draga bíl út úr skafli við Húsgagnahöllina á Höfða á tíunda tímanum í morgun. Þeir notuðu spil á dælubílnum við að draga bílinn, sem hafði setið fastur síðan í gær, úr skaflinum.

Samkvæmt upplýsingum frá slökkviliðinu var það tilviljun að slökkviliðsmenn óku fram á bílinn þegar verið var að losa hann og ákváðu að koma til hjálpar. Slökkviliðsmaður sem Vísir talaði við segir hins vegar að bílarnir séu ekki ætlaðir í verkefni sem þetta og því sé ekki hægt að hringja í slökkviliðið og fara fram á aðstoð af þessu tagi.