Íslenskur læknir í baráttu um 50 milljóna króna rannsóknarstyrk

Einn albesti vísindamaður Íslands, Hans Tómas Björnsson, á nú í æsilegri keppni á Facebook þar sem keppt er um allt að 400 þúsund dala peningaverðlaun eða sem nemur um 50 milljónum íslenskra króna.

Hans Tómas hefur nýlokið sérnámi í barna- og erfðalækningum við Johns Hopkins háskólasjúkrahúsið í Baltimore. Hann er nýráðinn lektor og sérfræðingur við sjúkrahúsið sem er eitt það virtasta í Bandaríkjunum.

Íslendingurinn er kominn í tíu manna úrslit þar sem keppt er um 10 þúsund dali í peningum og allt að 400 þúsund dali í aðstöðu- og rannsóknarkostnað. Rannsókn Hans Tómasar snýr að sjaldgæfum en áhugaverðum sjúkdómi, svonefndum Kabuki heilkennum.

Atkvæðagreiðslunni lýkur þann 15. mars og verða úrslitin kynnt daginn eftir. Hans Tómas er sem stendur í öðru sæti með 2526 atkvæði en Qiang Chang, við University of Wisconsin í Madison, leiðir keppnina með 2664 atkvæði.

Hægt er að styðja við bakið á íslenska lækninum með því að greiða honum atkvæði á Facebook. Smellið hér. Hægt er að kjósa einu sinni á dag til og með 15. mars.