Fiskiskip sigla á milli Þorlákshafnar og Eyja

Annan daginn í röð var báðum ferðum Herjólfs á milli Þorlákshafnar og Vestmannaeyja aflýst í dag. Gámaskip hafa heldur ekki komist til Eyja en engu að síður sigla fiskiskip þarna á milli.

„Að vissu leyti skilur maður þeirra afstöðu en hins vegar spyr maður sig af hverju Herjólfur getur ekki siglt þar sem fiskiskip hafa siglt síðasta sólarhringinn til Þorlákshafnar og Reykjavíkur," segir Björn Matthíasson, yfirmaður vörustjórnunar hjá Vinnslustöðinni í samtali við Rúv.

Björn segir það stundum gerast að gámaskip hafi ekki viðkomu í Eyjum vegna veðurs. Honum finnst þó mjög sérstakt að hvorki skip Eimskipa né Samskipa komist til Eyja. Eitt skipa Eyjaflotans flutti í gær fisk frá Eyjum til Þorlákshafnar og í dag sigldi uppsjávarskipið Ísleifur sömu leið.

Athuga á með morgunferð Herjólfs í fyrramálið klukkan 07. Sigli skipið ekki er ljóst að vöruskorts fer að gæta í Vestmannaeyjum. Það staðfestir Ingimar Georgsson, kaupmaður í Vöruval í samtali við Eyjafréttir.

„Þegar þetta er svona, þá eigum við til það sem við fáum á mánudegi og það dugir okkur eitthvað inn í vikuna. En ég geri ráð fyrir að mjólk klárist núna á næstu mínútum og svo fer að verða skortur á öðrum vörum eins og ávöxtum og kjöti," sagði Ingimar í samtali við Eyjafréttir síðdegis í dag.

Hægt er að fylgjast með nýjustu fregnum af ferðum Herjólfs á Facebook-síðu ferjunnar.