Ánamaðkur of snemma á ferð

Ánamaðkur, af tegundinni grááni, var heldur snemma á ferðinni þegar hann skreið upp úr moldinni á sunnudaginn var.

Hér á landi er tíu tegundir ánamaðka að finna. Grááni er einkar algengur í görðum okkar og hefur jafnan þann háttinn á að skríða upp úr moldinni á hlýjum vordögum. Þá koma herskarar þeirra upp úr blómabeðum og grasflötum og skríða út á blautar stéttar til að stefna marklaust hver í sína áttina. Á vef Náttúrustofnunnar kemur fram að tegundin hafi þennan hátt á að dreifa sér og nema nýjar slóðir. Þetta sé sannur vorboði enda gerist það jafnan þegar klaki hefur farið úr jörðu og vorið tekið völdin, oft í kringum mánaðamótin mars/apríl.

Það mun hins vegar vera sjaldgæft að sjá gráána skríðandi á stéttum í febrúar eins og gerðist í Hafnarfirði að morgni sunnudagsins síðastliðins. Hlýindin í vetur, ekki síst í þessum mánuði, gerðu það að verkum að jarðvegur sé klakalaus og af sömu sökum eflaust mun heitari en norm þessa árstíma. Aukinheldur bleyttu tíðar regnskúrir vel upp í moldinni þessa helgina. Náttúrufræðistofnun segir að ef til vill þurfi ánarnir að súpa seiði af bráðlætinu. Framundan sé mars og sjaldnast hafi verið á hann treystandi.