Sátu rýnifund vegna bilunar í þotu Icelandair

Fulltrúar viðbragðsaðila á Suðurnesjum og höfuðborgarsvæðinu sátu í dag rýnifund um atvik sem átti sér stað í þotu Icelandair fyrr í vikunni. Bilun varð í vökvaknúnum stjórnbúnaði þotunnar. Samkvæmt nýrri flugslysaáætlun var neyðarástandi lýst yfir á flugvellinum.

Á meðal þeirra sem sóttu fundin voru fulltrúar frá slökkviliði, ISAVIA, Landsbjörgu, lögreglu og Rauða Krossinum sem bauð farþegum upp á áfallahjálp.

Á fundinum var farið yfir atvikið í heild sinni, allt frá því að boðun barst frá flugstjóra um bilun og til lendingar. Samkvæmt upplýsingum frá ISAVIA liðu um 15 mínútur frá því að neyðarkall barst og þangað til að neyðarástandi var aflétt.

Sigríður Björk Guðjónsdóttir, lögreglustjóri á Suðurnesjum, vildi ekki gefa upp nákvæmar upplýsingar það sem fram kom á fundinum.