Segir ráðuneyti og embætti tala einum rómi

Ögmundur Jónasson innanríkisráðherra sagði í samtali við Vísi eftir sameiginlegan nefndarfund um FBI málið að hann, ríkissaksóknari og ríkislögreglustjóri töluðu einum rómi um veru FBI hér á landi.

Ögmundur segir að upphaflega hafi verið gefin út réttarbeiðni í júní árið 2011 þegar íslensk yfirvöld voru upplýst um það af hálfu bandarísku alríkislögreglunnar, að tölvuárás væri yfirvofandi hér á landi. Sú réttarbeiðni hefði aftur á móti verið endurskoðuð þegar fulltrúar alríkislögreglunnar komu hingað til lands í lok ágúst, "þar sem heimsókn FBI rúmaðist ekki innan réttarbeiðninnar," bætir Ögmundur við.

Ástæðan fyrir því að heimsókn FBI rúmaðist ekki innan beiðninnar var sú að tilgangur fulltrúanna var að ræða við ungan mann sem er íslenskur ríkisborgari og gaf sig fram í bandaríska sendiráðinu.

FBI ræddi við hann í fimm daga eftir að réttarbeiðnin var afturkölluð en þá snérist rannsóknin um Wikileaks, enda var pilturinn eitt sinn sjálfboðaliði hjá samtökunum.

"Og við skulum ekki gleyma því að þessi maður ræddi sjálfviljugur við FBI, en við erum að ræða um form samstarfs á milli íslenskra og erlendra löggæsluyfirvalda," segir Ögmundur.

Spurður hvort afskipti ráðherrans af einstökum sakamálum séu eðlileg, eða hvort hann líti svo á að hann hafi haft afskipti af sakamáli sem slíku, svarar Ögmundur að svo sé ekki, enda tók ráðuneytið eingöngu afstöðu til réttarbeiðninnar, sem er hlutverk ráðuneytisins.

Samantekt ráðuneytisins er að finna á vef þess hér. Nefndarfundinum er lokið.