Mikið reynt á VG á kjörtímabilinu - Björn Valur íhugar framboð til varaformanns

Katrín Jakobsdóttir hefur lýst yfir framboð til formanns vinstri grænna. Björn Valur Gíslason íhugar að bjóða sig fram til varaformanns. Nýrrar forystu flokksins bíður erfitt verkefni.

Katrín Jakobsdóttir varaformaður vinstri hreyfingarinnar græns framboðs lýsti því yfir í hádeginu að hún biði sig fram sem formaður en kosið verður um embætti á landsfundi flokksins um næstu helgi.

Björn Valur Gíslason mun íhuga að bjóða sig fram til varaformennsku í flokknum og viðurkennir að talsvert hefði verið leitað til sín vegna þess. Hann vildi þó ekkert segja frekar en sagði að málin myndu skýrast frekar á morgun.

Það þrætir enginn fyrir það að Vinstrihreyfingin - grænt framboð hafi þurft að takast á við mörg erfið verkefni á liðnu kjörtímabili. En það eru innanflokksátök sem hafa leikið flokkinn hvað verst.

Sem dæmi um átök innan flokksins má nefna að í lok september 2009 þegar Ögmundur Jónasson segir af sér ráðherradómi í mótmælaskyni við þá kröfu að ríkisstjórnin ætti að tala einu máli í Icesave málinu. Hann hélt þó áfram stuðningi við ríkisstjórnina. Í mars 2011 sögðu þingmennirnir Atli Gíslason og Lilja Mósesdóttir sig úr flokknum. Skömmu síðar fylgdi Ásmundur Einar Daðason á eftir. Í lok síðasta árs tilkynnti svo sjálfur oddviti Vinstrihreyfingarinnar Guðfríður Lilja Grétarsdóttir að hún hygðist hætta í stjórnmálum um áramótin. Jón Bjarnason sagði sig svo úr flokknum í síðasta mánuði -- sem og Hjörleifur Guttormsson, einn af þremur stofnendum flokksins.

Eiríkur Bergmann, prófessor í stjórmálafræði, segir þau verkefni sem þessi vinstrisinnaði og róttæki flokkur hafa reynt mjög á.

„VG er vinstrisinnaður flokkur róttæklinga sem er í mikilli andstöðu við ríkjandi stjórnmálastefnu frjálshyggjunnar sem þeir telja að hafi gengið allt of langt. Svo í efnahagshruninu þá veljast þeir til forystu. Þeir þurfa þá að framfylgja stefnu AGS sem er holdgervingur alþjóða kapítalsins og taka á sig skuldbindingar fallinna banka í tvíhlíða samningaviðræðum við Breta og Hollendinga, semja um aðild að ESB og skera niður velferðarkerfið og ríkisútgjöld inn að beini. Þetta er mjög alvarlegt ástand fyrir flokk eins og VG."

Hann telur að aðeins Katrín Jakobsdóttir, sem í dag tilkynnti að hún myndi sækjast eftir formannssæti geta náð aftur sáttum innan flokksins. Katrín telur að þótt flokkurinn hafi ekki komið vel út úr könnunum að undanförnu eigi flokkurinn talvert fylgi inni enda eigi hann brýnt erindi.

„Það er alveg rétt. Við höfum öll okkar hugsjónir og það er hægt að dæma fólk út frá hugsjónum, en þegar kemur að ríkisstjórnarsamstarfi þá á ávallt að gera málamiðlanir. Það þarf líka að skoða hvernig þær málamiðlanir hafa verið gerðar og dæma okkur út frá því," segir Katrín.

Katrín nefnir hér fjölbreytta atvinnustefnu sem byggir ekki á stóriðju, skattkerfi sem byggi á jöfnuði, kvenfrelsi og náttúruvernd.

„Þær málamiðlanir sem við höfum gert hafa eigi að síður skilað árangri í okkar stefnumálum."