Jóhanna talaði 11 sinnum um Sjálfstæðisflokkinn

1. febrúar 2013 16:40

Jóhanna Sigurðardóttir, formaður Samfylkingarinnar

Jóhanna Sigurðardóttir minntist á Sjálfstæðisflokkinn ellefu sinnum í setningarræðu sinni á Landsfundinum í dag. Á síðasta landsfundi minntist hún á flokkinn tuttugu sinnum í ræðu sinni. Það eru því tæplega helmingi færri tilvitnanir í Sjálfstæðisflokkinn á milli ára.

Hér fyrir neðan má sjá tilvitnanirnar í ræðunni í dag:

„Nú höfum við svart á hvítu, samanburðinn á ríkisstjórnarsamstarfi til vinsti, leiddu af Samfylkingunni og fjölda ríkisstjórna til hægri, leiddum af Sjálfstæðisflokknum."

„Við höfum einfaldlega sýnt og sannað með verkum okkar, að við jafnaðarmenn vorum og erum traustsins verðir og að í okkar höndum er hag þjóðarinnar betur borgið en hjá Sjálfstæðisflokknum."

„Í þessari meira en 140 klukkustunda umræðu sem þegar hefur farið fram á Alþingi hefur langmest verið rætt um auðlindaákvæðið og beina lýðræðið, en Sjálfstæðismenn hafa fram til þessa komið í veg fyrir að allar slíkar breytingar næðu fram að ganga."

„Og hversvegna liggur okkur á að samþykkja þær nú á þessu þingi er spurt. Svarið er einfalt, því ef svo illa færi að Sjálfstæðismenn næðu hér völdum að loknum næstu kosningum þá er ekki á vísan að róa, að efnislega héldu tillögur stjórnlagaráðs í höndum þeirra, enda hefur Sjálfstæðisflokkurinn lýst því yfir að hann telji sig á engan hátt bundin af þeim þjóðarvilja sem birtist í þjóðaratkvæðagreiðslunni."

„Slíkur burðarflokkur jafnaðarmanna er og verður forsenda þess að Sjálfstæðisflokknum verði haldið utan Stjórnarráðsins og að þar fái frjálslynd viðhorf jafnaðarmanna, náttúruverndar og umhverfis, lýðræðis og kvenfrelsis að njóta sín."

„Samfylkingin er og verður áfram að vera, kjölfestan á miðju stjórnmálanna. Hún er eina von manna um raunverulegt mótvægi við Sjálfstæðisflokkinn. Sundraður og veikur vinstrivængurinn hefur tryggt áratuga völd Sjálfstæðisflokksins og það hefur verið hlutskipti annarra flokka að laga sig að frjálshyggju tilburðum hans til að geta átt aðild að ríkisstjórn - þar til Samfylkingin varð til."

„Smærri flokkar munu aldrei breyta neinu stórvægilegu í íslensku samfélagi í samstarfi við Sjálfstæðisflokkinn, hvað sem líður göfugum markmiðum og krafti þess góða fólks sem þar leggst á sveif. "

„Stóra stríðið í næstu kosningum verður því á milli Sjálfstæðisflokksins og Samfylkingarinnar - af stærð og styrk þessara flokka mun framtíð íslensks samfélags ráðast."

„Það ræðst af stærð Samfylkingarinnar hvort þjóðin fær sanngjarnan arð af auðlindum sínum eða ekki og hvort nýsamþykkt veiðigjald sem nema mun milljarðatugum á komandi árum mun renna til atvinnu uppbyggingar og samfélaglegra verkefna um allt land, eða beint í vasa útgerðarinnar eins og Sjálfstæðisflokkurinn hefur lofað."

Mest lesið

Fleiri fréttir