Fjórðungur óttast um fjárhagslega afkomu sína

Rúmur fjórðungur þjóðarinnar óttast um fjárhagslega afkomu sína. Þetta kemur fram í nýrri könnun Stöðvar 2 og Fréttablaðsins.

Aðspurð sögðust tuttugu og sjö prósent þátttakenda í könnuninni óttast mjög eða frekar mikið um fjárhagslega afkomu sína, tæp tíu prósent hvorki né og sextíu og fimm prósent frekar eða mjög lítið. Konur virðast vera eilítið áhyggjufyllri en karlar hvað þetta varðar en nær enginn munur var á svörum fólks eftir aldri eða búsetu.

Athyglisvert er að líta á svör þátttakenda eftir pólitískri afstöðu. Þannig sögðust um sjötíu og fimm prósent stuðningsmanna Bjartrar framtíðar, Samfylkingarinnar og Vinstri grænna lítið óttast um fjárhagslega afkomu sína miðað við tæp sjötíu prósent Framsóknarmanna og tæp sextíu og fimm prósent Sjálfstæðismanna.

Þá sagðist tæpur þriðjungur stuðningsmanna Sjálfstæðisflokksins óttast mikið um afkomu sína en það er frekar hátt hlutfall ef litið er til fjölda stuðningsmanna Vinstri Grænna sem svöruðu á þessa sömu leið, fimmtán prósent.

Könnunin var framkvæmd af 365 dagana 30. og 31. janúar og við framkvæmd hennar var hringt út þar til náðist í 800 manns samkvæmt lagskiptu úrtaki. Svarendur skiptust jafnt eftir kyni, og hlutfallslega eftir búsetu og aldri en 98 prósent þátttakenda tóku afstöðu til spurningarinnar sem lögð var fyrir, óttast þú um fjárhagslega afkomu þína.