Börnin þéna vel á síldarævintýrinu í Kolgrafafirði

Sannkallað síldarævintýri hefur ríkt í fjörunum við Kolgrafafjörð á Snæfellsnesi í allan morgun, þar sem að minnsta kosti 50 ungmenni úr Grundarfirði keppast við að tína dauða síld upp í kör, sem síðan verða flutt til Sandgerðis, þar sem síldinni verður breytt í loðdýrafóður til útflutnings.

Að sögn Bjarna Sveinbjörnssonar bónda á Eiði við fjörðinn, er mikill hugur í krökkunum og strax klukkan hálf tíu var búið að safna að minnstakosti tíu tonnum, og stefnt er að tuttugu tonnum, eða fullfermi á vörubíl, í þessari lotu. Og það er eftir nokkru að slægjast hjá krökkunum, því Skinnfiskur í Sandgerði borgar átta krónur fyrir kílóið, þannig að bílfarmurinn mun leggja sig á 160 þúsund krónur, sem krakkarnir ætla að leggja til félagsstarfs að eigin vali, á Grundarfirði.

Og til að hressa upp á krakkana í miðju atinu, býður Guðrún Lilja Arnórsdóttir húsfreyja á Eiði, upp á heimabakaða snúða og heitt súkkulaði í fjöruborðinu. Mikið kapp er í krökkunum að ná sem mestu, áður en aðfallið kaffærir síldina, upp úr hádegi. Vísindamenn Hafrannsóknastofnunar eru að meta niðurstöður úr úr myndatökum og mælingum frá því í gær, til að meta hversu mikið af síld hefur drepist að þessu sinni, en það liggur ekki enn fyrir.