Meintur barnaníðingur í farbann

Hæstiréttur Íslands felldi úr gildi gæsluvarðhaldsúrskurð Héraðsdóms Vesturlands yfir erlendum karlmanni sem er kærður fyrir að misnota tvær systur á árunum 2008 til 2011. Yngri stúlkan var 7 ára þegar misnotkunin átti að að hafa byrjað. Maðurinn neitar alfarið sök.

Maðurinn bjó á heimili systranna en hann átti upphaflega í ástarsambandi við móður þeirra. Því sambandi lauk ári síðar. Maðurinn var þó mikið heima hjá þeim upp frá því. Hann er kærður fyrir að hafa nauðgað systrunum ítrekað á fjögurra ára tímabili en matsmaður sem mat geðheilbrigði mannsins fann vísbendingar um að maðurinn væri haldinn barnagirnd. Sjálfur lýsti maðurinn því þannig að yngri systirin hefði byrjað að klæða sig ögrandi tíu ára gömul og farið að nálgast hann kynferðislega.

Matsmaðurinn sem mat geðheilbrigði mannsins hefur einnig áhyggjur af geðrænum einkennum mannsins, þannig virtist hann illa áttaður á stað og stund og öll hans svör einkenndust af samhengisleysi í viðtalinu við matsmanninn.

Hæstiréttur úrskurðaði að maðurinn skyldi sæta farbanni til 28. febrúar þó gæsluvarðhaldsúrskurðinum hafi verið hnekkt.