Aníta náði EM-lágmarkinu í 400 metra hlaupi

Hlaupakonan magnaða, Aníta Hinriksdóttir, gerði sér lítið fyrir í dag og náði EM-lágmarkinu í 400 metra hlaupi. Aníta er því búin að ná lágmarkinu í 400 og 800 metra hlaupi.

Lágmarkinu náði hún á meistaramótinu sem fram fer í Laugardalshöll um helgina.

Aníta kom í mark á 54,44 sekúndum en lágmarkið var 54,75 sekúndur.

Aníta er aðeins 17 ára gömul en hefur farið á kostum undanfarið ár og henni standa allir vegir færir á næstu árum.

Hafdís Sigurðardóttir vann sigur í langstökki kvenna með stökki upp á 6,17 metra. María Rún Gunnlaugsdóttir vann hástökkskeppnina með stökki upp á 1,73 metra sem er persónulegt met.

Óðinn Björn Þorsteinsson vann öruggan sigur í kúluvarpi með kasti upp á 17,78 metra.