Ætla að taka fjarskiptaöryggi landsins til endurskoðunar

Almannavarnir, fjarskiptafyrirtæki og orkufyrirtæki munu taka fjarskiptaöryggi landsins til endurskoðunar. Stórhætta getur skapast við langvarandi röskun á rafmagns- og símasambandi.

Íbúar á Vestfjörðum fengu margir hverjir að finna fyrir rafmagnsleysi milli jóla og nýárs þegar flutningslínur rofnuðu í aftakaveðri. Rafmagn fékkst aftur þegar varaaflstöðvar voru ræstar. Það var síðan í nótt þegar rafmagn fór aftur af á Þingeyri og víðar á Vestfjörðum.

Í yfirlýsingu sem Úlfar Lúðvíksson, sýslumaður á Ísafirði og á Patreksfirði sendi fjölmiðlum í dag, kemur fram að ekki sé lengur hægt að una við ástand raforkumála á Vestfjörðum.

Hann bendir á að þegar verst var um síðustu áramót hafi verið stutt í það að öll fjarskipti við Vestfirðir rofnuðu vegna rafmagnsleysis. Við slíkar aðstæður séu mönnum allar bjargir bannaðar og lífi og heilsu almennings ógnað.

Og Víðir Reynisson, deildarstjóri hjá Almannavörnum, tekur undir með Úlfari. Hann segir Almannavarnir fara nú yfir málið ásamt fjarskiptafyrirtækjum og orkufyrirtækjum. Ekki verður aðeins litið til Vestfjarðar, heldur fjarskiptakerfisins alls.

Eftir að óveðrið gekk yfir milli jóla og nýárs var hafist handa við að kortleggja það sem fór úrskeiðis. Póst- og fjarskiptastofnun óskaði þá eftir skýrslum frá fjarskiptafyrirtækjum um rafmagnsleysið.