Spáð vonskuveðri um allt land

Veður fer ört versnandi á landinu og verður enn verra síðdegis og í kvöld. Þá gengur í austan og norðaustan hvassviðri eða storm um mest allt land.

Um landið norðanvert má gera ráð fyrir snjókomu eða éljum og skafrenningi og slæmu skyggni, einkum á fjallvegum en á Austfjörðum er slydda eða rigning á láglendi en snjókoma til fjalla frá því síðdegis í dag. Þetta kemur fram hjá veðurfræðingi Vegagerðarinnar.

Við suðurströndina hvessir fyrr, en fyrir hádegi má búast við hvössum vindhviðum undir Eyjafjöllum. Í kvöld hvessir svo enn frekar Suðaustanlands, og fer að rigna. Suðaustan stormur, 18-25 m/s verður þar í kvöld og nótt og mjög hvassar vindhviður undir Vatnajökli.

Á Suðvesturlandi hefur snjóað talsvert og skyggni og færð geta því spillst fljótt þegar fer að hvessa síðdegis í dag og í kvöld. Ísingarhætta er til staðar, einkum á sunnanverðu landinu þar sem léttir til í kvöld og nótt.

Hálka á heiðum

Á Sandskeiði og í Þrengslum er hálka og hálka og skafrenningur á Hellisheiði sem og á Lyngdalsheiði en þæfingsfærð og skafrenningur á Mosfellsheiði, annars er hálka eða snjóþekja á flestum vegum á Suðurlandi.

Hálka er á Holtavörðuheiði, Bröttubrekku og Vatnaleið en annars er snjóþekja og hálka á Snæfellsnesi. Þæfingsfærð og skafrenningur er á Fróðárheiði. Hálka eða hálkublettir eru á Vesturlandi.

Á Vestfjörðum er víðast hvar hálka eða hálkublettir en snjóþekja og skafrenningur er á Steingrímsfjarðarheiði, Þröskuldum og Kleifaheiði. Hálkublettir og óveður er á Hjallahálsi en þæfingsfærð er á Klettshálsi en einnig á leiðinni norður í Árneshrepp.

Ófært á Hólasandi

Á Norðurlandi er hálka á flestum leiðum og sumstaðar éljagangur. Þó er snjóþekja og skafrenningur á Öxnadalsheiði. Þungfært og óveður er á Mývatnsöræfum og í raun ekkert ferðaveður. Ófært er á Hólasandi. Hálka og skafrenningur er á Hófaskarðsleið og snjóþekja á Hófaskarði.

Það er svo svipuð færð á Austurlandi, hálka eða hálkublettir mjög víða. Hálka og skafrenningur er á Vopnafjarðarheiði og snjóþekja og skafrenningur á Möðrudalsöræfum og Fjarðarheiði. Hálka og éljagangur er á Oddskarði. Með suðausturströndinni er að mestu hálkublettir eða hálka en þó autt á köflum.

Þungatakmarkanir

Á Austurlandi er ásþungi takmarkaður við 10 tonn á Suðurfjarðarvegi, frá Vattarnesvegi í botni Fáskrúðsfjarðar að Hringvegi við Breiðdalsvík og þaðan á Hringveginum suður um að Hafnarvegi.

Hreindýr á Austur- og Suðausturlandi

Vegagerðin og Náttúrustofa Austurlands vara vegfarendur við umferð hreindýra á Austur- og Suðausturlandi.

Sjá staðsetningu hreindýra hér.