Innlent

Ísland eina landið þar sem kynferðisbrot gegn börnum eru ófyrnanleg

„Þetta mál sem nú tröllríður samfélaginu undirstrikar það hversu mikilvægt það var að ná lagabreytingum í gegn um afnám fyrningar í kynferðisbrotum gegn börnum," segir Ágúst Ólafur Ágústsson, fyrrverandi þingmaður og formaður allsherjarnefndar.

Um fátt annað er rætt þessa dagana en endurtekin kynferðisbrot Karls Vignis Þorsteinssonar gegn börnum. Hann hefur viðurkennt að hafa brotið á hátt í fimmtíu börnum á síðustu fimm áratugum. Mörg brotanna eru nú fyrnd.

Tillagan var fyrsta þingmál Ágústs Ólafs en hún var lögð fram árið 2003. „Fjórar tilraunir þurfti til en það var síðan árið 2007 sem það tókst að ná fram lagabreytingum. Núna eru alvarlegustu kynferðisbrotin gegn börnum ófyrnanleg."

„Mitt upprunalega þingmál laut að því að gera flest öll kynferðisbrot gegn börnum ófyrnanleg. En það náðist ekki í gegnum þingið. Eins og flestir muna þá var andstaða við þessa breytingu á sínum tíma."

Ágúst Ólafur segir að mótrökin hafi annars verið sú að breytingarnar væru stílbrot á lögunum þar sem flest brot fyrnast. Hins vegar var honum bent á að þessi brot fyrnast í nær öllum nágrannalöndum okkar. „En ég talaði fyrir því að sérstaða þessara brota væri slík að hún kallaði beinlínis á það að þau væru ófyrnanleg."

„Ísland er, eftir því sem ég best veit, eina landið í heiminum sem hefur kynferðisbrot gegn börnum ófyrnanleg."

Ágúst Ólafur var gestur í útvarpsþættinum Reykjavík síðdegis á Bylgjunni í dag. Hægt er að hlusta á viðtalið hér fyrir ofan.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.