Kári: Mætum með allar vélar fullar af bensíni gegn Katar

Kári Kristján Kristjánsson, línumaður íslenska landsliðsins í handbolta, fullyrðir að íslenska liðið verði með allar vélar fullar af bensíni þegar liðið mætir Katar í dag í lokaumferð B-riðilsins á heimsmeistaramótinu á Spáni. Kári er ánægður með stuðningsmenn Íslands á mótinu og það er óvíst hvort skeggið fái að lifa út keppnina hjá Eyjamanninum.

„Ég held að Katar sé þannig mótherji að þeir kæmu með eitthvað sem við höfum aldrei séð. Við eru með fullt af efni frá þeim og það getur vel verið að þeir haldi bara áfram að gera það sem þeir eru vanir að gera. Ég held að við höfum farið það vel yfir þá að þeir ættu ekki að koma okkur eitthvað sérstaklega á óvart. Breiddin er ekki mikil hjá þeim en við þurfum að sjálfsögðu að vera með vélarnar hjá okkur fullar af bensíni í leikinn."

Kári lék vel í sókninni gegn Dönum þar sem hann skoraði alls 8 mörk samkvæmt tölfræði mótshaldara og sjálftraustið er að aukast hjá Eyjamanninum.

„Þetta er eitthvað sem ég get byggt á fyrir framhaldið og ég finn að ég er a fá traust. Ég var ekki góður gegn Makedóníu og klúðraði tveimur skotum sem ég átti að klára."

Kári er ánægður með hóp leikmanna ÍBV sem er í æfingaferð í Sevilla og mætir á alla leiki Íslands og hvetur liðið til dáða. „Ég hef sagt það áður að þegar fleiri en fimm Eyjamenn koma saman þá erum við komnir með itla Þjóðhátíð. Þeir kunna að hvetja okkur og skemmta sér. Það er mikill munur fyrir okkur að vera með lifandi fólk á pöllunum og virkilega gaman að fylgjast með þeim.

Kári skartar myndarlegu skeggi á heimsmeistaramótinu líkt og Róbert Gunnarsson og Snorri Steinn Guðjónsson. Vignir Svavarsson yfirgaf skeggjaða liðið fyrr í vikunni en Kári segir enga keppni vera í gangi hvað varðar skeggið. „Ef ég tala fyrir mig þá nenni ég stundum að vera með skegg og stundum ekki. Núna nenni ég að vera með það," sagði Kári Kristján Kristjánsson en viðtalið má skoða í heild sinni með því að smella á örina hér fyrir ofan.