Björt framtíð er þriðji stærsti flokkurinn

Björt framtíð er þriðji stærsti stjórnmálaflokkur á Íslandi samkvæmt nýrri skoðanakönnun sem gerð var fyrir Fréttablaðið og Stöð 2 og verður greint nánar frá í kvöldfréttum Stöðvar 2.

„Við erum ánægð með þetta. Þetta er í takti við niðurstöður annarra kannana. Það er stemning fyrir Bjartri framtíð og því sem við erum að gera og við ætlum að halda áfram að gera það vel," segir Guðmundur. „Það sem er að komast betur og betur í gegn er að við erum að bjóða upp á allt aðra pólitík heldur en hefur viðgengist undanfarna áratugi á Íslandi," segir hann.

„Við erum að bjóða upp á yfirvegaðri og sanngjarnari nálgun og leggja áherslu á að við reynum að ná meiri sátt um stór og mikilvæg mál án þess þó að við gerum lítið úr því að skoðanir okkar eru skiptar í þjóðfélaginu," segir Guðmundur. Þetta hafi gengið illa á Íslandi og verr en annarsstaðar í Skandínavíu. Mikið af hefðum í pólitíkinni séu bara niðurrif. Guðmundur bendir á að vel hafi tekist til við þetta í borginni og Besti flokkurinn breytt þar miklu.

Könnunin var gerð dagana sextánda og sautjánda janúar. Hringt var þangað til náðist í 800 manns sem valið var með slembiaðferð. Úrtakið var lagskipt þannig að svarendur skiptust jafnt eftir kyni og hlutfallslega eftir búsetu og aldri.

Ítarlega verður fjallað um könnunina í kvöldfréttum Stöðvar 2.