Hér dugar enginn "heimilskattaþvottur“

Jón Bjarnason, þingmaður Vinstrihreyfingarinnar - græns framboðs, segir á bloggsíðu sinni að ástæðan fyrir löku gengi flokks hans í nýjum þjóðarpúlsi Gallups sé sú að forystumenn flokksins séu of hallir undir vegferð Samfylkingarinnar um að sækja um aðild að ESB.

Flokkurinn mælist aðeins með 9,1% fylgi sem er undir helmingi þess fylgis sem flokkurinn fékk í síðustu alþingiskosningum.

„Kjósendur VG hafa fengið gjörsamlega upp í kok af þrákelkni þeirra forystumanna VG sem hafa keyrt þessa ESB umsókn áfram , sumir undir þeim formerkjum að „kíkja í pakkann", skrifar Jón á blogg sitt og bætir við að eina leiðin til þess að snúa taflinu við sé að „ brjótast undan því valdi [ESB umsókninni innskt. blm.] og losa sig úr þeim álögum þegar í stað."

Og að mati Jóns dugar ekkert hálfkák, eða eins og hann orðar það sjálfur: „Þarna er í raun ekkert val. Hér dugar enginn „heimilskattaþvottur", svo gengið sé í smiðju forsætisráðherra Samfylkingarinnar. Forysta Vinstri Grænna, sem þarna á í hlut, verður einfaldlega að stíga fram og biðja þjóðina og kjósendur VG afsökunar fyrir að hafa gengið undir þessi álög ESB og Samfylkingarinnar."

Hægt er að lesa blogg Jóns hér.