Sjá ekkert athugavert við að kirkjan aðstoði við tækjakaup

Almenningur hefur staðið straum af allt að helmingi af því fé sem gert hefur verið ráð fyrir til tækjakaupa á Landspítalanum undanfarinn þrjú ár. Hvorki forstjóri Landspítalans né velferðarráðherra sjá neitt athugavert við að kirkjan vilji aðstoða við tækjakaupin eins og biskup hefur lagt til.

Agnes M. Sigurðardóttir biskup varpaði fram þeirri hugmynd í nýárspredikun sinni að þjóðkirkjan hefði forystu um söfnun fyrir betri tækjakosti Landspítalans. Sagði hún að oft hefði samtakamáttur þjóðarinnar skilað miklum árangri í þessum efnum.

Björn Zoega, forstjóri Landspítalann, sagði í samtali við fréttamann í dag að hann sæi ekkert athugavert við þessar hugmyndir. Fjöldi sjúkrastofnanna hefði orðið til fyrir tilstuðlan einstaklinga og félagasamtaka. Má þá nefna að Gamla Landspítalann, Vífilstaði, Barnaspítala Hringsins og líknardeildina í Kópavogi.

Eftir hrun hafa tækjakaup á spítalanum orðið erfiðari ekki síst vegna gengishruns krónunnar. Á mynd í myndskeiðinu hér að ofan má sjá það fé sem stjórnvöld hafa varið beint til tækjakaupa á landspítalanum undanfarinn ár, táknaðar með gráum lit. Hlutdeild almennings og góðgerðarsamtaka við fjármögnunin tækja er táknum með grænu súlunum.

Þarna sést að almenningur staðið straum að allt að helmingi kaupanna á móti ríkinu undanfarin þrjú ár.

Það skal þó tekið skýrt fram að mun meira fé hefur verið varið til tækjakaupa í gegnum tíðina en það fé hefur þá verið tekið af því sem ætlað er til reksturs spítalans því spítalinn hefur neyðst til þess að bregðast við stöðunni.

Og þar fyrir utan skal það tekið fram að á fjárlögum ársins 2013 eru áætlaðar 860 milljónir króna til tækjakaupa á Landspítala. En það er líklega mesta framlag ríkisins hingað til.

Þingmaðurinn Sigríður Ingibjörg Ingadóttir sem einnig er formaður velferðarnefndar, gagnrýndi fyrirhugaða söfnun kirkjunnar fyrir tækjakaupum harðlega í fréttum Ríkisútvarpsins í gær.

Velferðarráðherra er henni þó ekki sammála.

„Ég hef lagt áherslu á það að almannaheillasamtök hafa alltaf hjálpað bæði heilbrigðisstofnunum og ýmsum öðrum þjónustustofnunum þegar á þarf að halda. Þannig að ég fagna því að kirkjan komi til liðsinnis við okkur," segir Guðbjartur Hannesson, velferðarráðherra.