Segir leigusala hafa sett upp myndavél til þess að vakta uppvaskið

„Ég myndi ekki búa svona og ég get ekki ætlast til þess að dóttir mín geri það," segir Halldóra Eyfjörð Skjaldardóttir, sem ætlar að kæra leigusala dóttur sinnar fyrir brot á persónuverndarlögum en sá hefur sett upp tvær eftirlitsmyndavélar á sameign leiguhúsnæðis.

Dóttir Halldóru, Ástrós Lind Eyfjörð, uppgötvaði að búið væri að setja upp myndavélarnar á gamlársdag. Móðir hennar heldur því meðal annars fram að myndavélin taki upp allar mannaferðir á ganginum, þar á meðal hverjir koma og fara úr herbergi dóttur hennar. Þá er einnig myndavél inni í eldhúsinu, en Halldóra segir að tilgangurinn sé sá að vakta uppvaskið, sem leigusalanum hefur fundist vandamál, og er meðal annars ástæðan fyrir því að myndavélarnar voru settar upp að sögn Halldóru.

„Þetta hefur ekkert með öryggi að gera," bætir Halldóra við og bendir máli sínu til stuðnings á það að engin eftirlitsmyndavél við inngang hússins.

Halldóra segir dóttur sína ósátt við vöktunina, og hefur flutt út. Hún vilji aftur á móti fá til baka 50 þúsund króna tryggingu sem leigusalinn, Einar B. Ísleifsson, neitar að endurgreiða, að sögn Halldóru. Í viðtali við DV, sem vakti fyrst athygli á málinu, segir Einar að hann hafi sett myndavélarnar upp vegna slæmrar umgengni á sameigninni.

Hann bætti svo við að myndavélarnar hafi einnig verið settar upp til þess að koma í veg fyrir þjófnað.

Í lögum um rafræna vöktun kemur fram að það verði að fræða viðkomandi um rafræna vöktun sem á sér stað í húsnæði þeirra. Halldóra fullyrðir að dóttir sín hafi aldrei verið tilkynnt um myndavélarnar.

Þá féll úrskurður hjá Persónuvernd árið 2006, þar sem nemar kvörtuðu vegna rafrænnar vöktunar á gangi á heimavist framhaldsskóla. Þess ber þó að geta málin eru ekki endilega sambærileg, þó málin séu keimlík.

Persónuvernd hefur ekki fengið málið inn á sitt borð, en Halldóra segist ætla að kvarta undan eftirlitinu hið fyrsta.