Dæmdur fyrir að svíkja fé af Magnúsi Ármann - þarf að endurgreiða um 40 milljónir

Sextugur karlmaður var dæmdur í átján mánaða skilorðsbundið fangelsi í Héraðsdómi Reykjavíkur í morgun fyrir að hafa svikið hátt í fjörutíu milljónir króna út af greiðslukorti í eigu athafnamannsins Magnúsar Ármann.

Maðurinn tók mest 3,2 milljónir króna út af kortinu í einu, og það nokkrum sinnum. Maðurinn hélt því fram að hann hefði leyfi Magnúsar Ármann til þess að taka allt að fjórar milljónir króna út af kortinu mánaðarlega til styrktar starfssemi hans í meðferðarmálum og hafði undir höndum falsaðan samning sem átti að sýna fram á þetta.

Áður en yfir lauk hafði maðurinn tekið alls 32 sinnum út af kortinu, samtals um 38 milljónir króna.

Maðurinn virðist hafa komist yfir númer á greiðslukorti Magnúsar á veitingastaðnum Strawberries í miðborg Reykjavíkur, sem er svokallaður kampavínsklúbbur. En þar starfaði hinn seki.

Og málið verður öllu sérkennilegra þegar lögmaður Magnúsar Ármann hefur samband við Jóhann R. Benediktsson, þáverandi lögreglustjóra á Keflavíkurflugvelli. Bað lögmaðurinn Jóhann að ræða við hinn ákærða í málinu sem Jóhann kannaðist við vegna starfs síns. Þeir hittust í desember árið 2007 en þá játaði maðurinn að vera í óreglu og að hafa eytt fjármununum.

Auk þess sem maðurinn er dæmdur til refsingar er honum gert að greiða Magnúsi Ármanni 9,6 milljónir í miskabætur en hann þarf að greiða Borgun 28 milljónir króna. Samtals um 38 milljónir.

Öll brotin áttu sér stað á níu mánaða tímabili árið 2007. Ekki var ákært í málinu fyrr en um fimm árum síðar. Vegna óeðlilegs dráttar á rannsókn lögreglu er refsing mannsins skilorðsbundin.

Við þetta má bæta að núverandi rekstraraðilar Strawberries eru ekki þeir sömu og ráku staðinn árið 2007.