Sjá eftir að hafa heiðrað barnaníðing vegna umfjöllunar Kastljóss

Í yfirlýsingu frá Áskirkju kemur fram að það hafi verið rangt hjá kirkjunni að veita Karli Vigni Þorsteinssyni viðurkenningu fyrir störf sín í þágu kirkjunnar sem sjálfboðaliði.

Orðrétt segir í yfirlýsingunni: „ Í Áskirkju voru 30 einstaklingum veittar slíkar viðurkenningar, og var Karl Vignir í þeim hópi. Í ljósi þess sem fram hefur komið í umfjöllun Kastljóss nú, og Karl Vignir játaði þar á sig, er augljóst að sú ákvörðun var röng."

Þess má geta að DV hafði ítrekað fjallað um kynferðismisnotkun Karls Vignis þegar hann starfaði á Kumbaravogi. Það var árið 2007. Einnig fjallaði Morgunblaðið um misnotkun Karls Vignis, og var hann nafngreindur í báðum umfjöllununum. Engu að síður fékk hann viðurkenningu kirkjunnar á síðasta ári.

Þá kemur ennfremur fram í tilkynningunni að Karl Vignir hafi aldrei annast um né komið á nokkurn hátt að starfi með börnum og unglingum í Áskirkju.

Samkvæmt upplýsingum frá kynferðisafbrotadeild lögreglunnar á höfuðborgarsvæðinu hefur Karl Vignir verið boðaður í skýrslutöku vegna þáttarins síðdegis í dag.

Hér má lesa tilkynningu kirkjunnar í heild sinni:

Í tilefni af umfjöllun Kastljóss um málefni Karls Vignis Þorsteinssonar og þátt hans sem sjálfboðaliði í safnaðarstarfi í Áskirkju í Reykjavík, vilja sóknarprestur, sóknarnefnd og starfsfólk Áskirkju koma eftirfarandi á framfæri:

Karl Vignir hefur aldrei annast um né komið á nokkurn hátt að starfi með börnum og unglingum í Áskirkju.

Þátttaka hans í starfi sem sjálfboðaliði við Opið hús aldraðra hófst í kringum árið 2003 með aðstoð í eldhúsi. Hann varð síðar hluti af hópi sjálfboðaliða í heimsóknaþjónustu í söfnuðinum.

Í kjölfar umfjöllunar í fjölmiðlum árið 2007 um Karl Vigni, var hann leystur frá störfum sem sjálfboðaliði, og hefur síðan ekki gegnt neinum trúnaðarstörfum fyrir kirkjuna.

Á Evrópuári sjálfboðastarfs í kirkjunni 2011 var þjóðkirkjusöfnuðum boðið að veita sjálfboðaliðum viðurkenningu fyrir störf sín. Í Áskirkju voru 30 einstaklingum veittar slíkar viðurkenningar, og var Karl Vignir í þeim hópi. Í ljósi þess sem fram hefur komið í umfjöllun Kastljóss nú, og Karl Vignir játaði þar á sig, er augljóst að sú ákvörðun var röng.

Hugur okkar er hjá þeim sem Karl Vignir hefur beitt ofbeldi.