Myndaði fjölda háhyrninga í Grundarfirði - návígið ótrúlegt

„Ætli þetta hafi ekki verið um 15-20 hvalir þar sem við vorum," segir björgunarsveitarmaðurinn og Grundfirðingurinn Tómas Logi Hallgrímsson, sem náði ótrúlegu myndbandi af háhyrningum sem leituðu ætis í Grundafirði síðasta sunnudag.

Tómas Logi, móðir hans og faðir, ákváðu að nýta fallegan daginn til þess að fara út á báti föður Tómasar Loga, og þannig náði hann þessum myndum. „Þeir voru þarna til þess að ná í æti," segir Tómas Logi en nóg er af síld í firðinum þessa dagana.

Að sögn Tómasar er þetta í annað skiptið sem hann sér svona marga háhyrninga í firðinum, „síðast var ég ekki með myndavél," útskýrir hann. Tómas Logi nýtti svo sannarlega tækifærið í annað skiptið og náði myndum af hvölunum.

En hvernig var návistin við þessar stóru skepnur?

„Það er náttúrulega ótrúlegt. Maður áttar sig til dæmis ekki á stærð skepnanna fyrr en maður getur næstum teygt sig í þær. Ég þurfti stundum að líta til beggja hliða til þess að sjá allan hvalinn," segir Tómas Logi um þennan ævintýralega dag.

Myndbandið er hægt að skoða hér fyrir ofan.